(عم ابراهيم علي باب الوزير) &&&& بقلم...محمد عسل &&&&
(عم ابراهيم علي باب الوزير)
خَبَّط علي باب الوزير عم ابراهيم.. الخبطه كانت صوتها واطي وبانكسار..ماوصِلش صوتها غير لِحَلْق الباب أكيد... وخنقها طوق الباب عشان مدقوق مرار...واتسرسِبِت من تحت عَقب الباب دموع..من قلب غُطيان العيون تُطلُب نهار...الخبطه كانت عاوزه تِزعَّق من جديد..ف رَمَتها إيد عم ابراهيم ف الإنتظار.. علشان يوقَّف كل أفكارُه طابور.. الفكره واقفه جنب فكره ف المسار..أولهُم إن فلوس بتبكي ف وصل نور.. بعديها إن الفاكهه لابسه توب خُضار..والعدل ورده بس ساكنه أرض بور..والظلم ساكن كل حي وكل دار.. والصدق بعد م كان معشش ف القلوب..ُإتهَد عِشُه قالوا يسكن وسط نار..فيه فكره قالت بعد إذنك يابراهيم... قول للوزير منين اجيب حق الإيجار؟!وجهاز بناتي بعد إذنك يابراهيم... والواد كريم شهادتُه واقفه تبيع مرار.. عم ابراهيم عم ابراهيم عم ابراهيم..والفكره تِولد فكره تِنزل تِستجار..طِلعِت إدِيه من زَحمة الهم التقيل...وبرعشه عادت تاني خبطة لانكسار...ف سمعها بعد صعوبه قال سيدنا الوزير... هو انت بتخبط عليا يابراهيم؟هَد الطابور..نطَق ابراهيم.. أبداً يابيه.. دانا بس بمسح باب سعادتك م العُفار.بقلم...محمد عسل
ليست هناك تعليقات:
إرسال تعليق