جرحك المفتوح && بقلم الشاعره / إيزيس غانم

جرحك المفتوح...

كأنى بسن سكينتى ..

دبحت جوّه منى الروح...

فحاسبنى ...وعاتبنى ..

وخلّى صرختك سكين..

سكوتك موّت الفرحه..

وموّت دمى ف الشرايين..

فعود بيا لإبتسام روحك...

ياأجمل روح يا نور العين..

وسامحنى ..وخلينى ..

أداوى جرحك المفتوح..

ــــــــــــــــــــــــــــــــــ

خيولى ف ملعبين عينك ..

خيول جامحه..

تخطّى موانع الأحزان ...

عشان تهدى لك الفرحه ..

خيولى ف الحروب جارحه ..

صهيلها رماح..وبحر غضوب ..

وموج عاتى ..

لاكن على بابك المجروح..

تهدّى الخطوه ..وتتاتى ..

فعود بيا لإبتسام روحك 

يا أجمل روح ..

جرحتك ..بس صاب جرحك ..

جوه منى الروح ..

فسامحنى وخلينى ..

أداوى جرحك المفتوح...

ـــــــــــــــــــــــــــــــــــــ

أنا عارفه إنى نور عينك ..

وروح قلبك..

لكن إنت اللى قستنى 

ف لحظة ما إبتديت عندك..

ركبت حصانك المجنون ..

وصابتنى سهام غضبك..

فكنت الجارح الأول..ومن جرحى ..

فتحت ف مهجتك جرحك ...

فسامحنى يا روح الروح يا نور العين ..

وخدنى ف حضنك الدافى ..

نداوى ..بالدفا جرحين ...

ــــــــــــــــــــــــــــــــــــــــــــــــــــــــ

قصيدة \\ جرحتك ..

إيزيس غانم ..